\\ Home Page : Articolo : Stampa
PARE CA NCE SIMMO!
Di Admin (del 28/12/2011 @ 18:52:22, in Articoli , linkato 1505 volte)
Napole stà tutto ‘coppa a penziere, e ll’Italia tutta pare che fosse a la vigilia de na gran cosa, de na festa de famiglia, de no sposarizzio addesederato, de na chioppeta de confiette ca ll’ànno da chiovere dinto a lu mantesino da no momento a n’autro. La parola è una, lo mutto d’ordene è lo stesso ntra tutte quante, la voce che corre è voce comune: LA GUERRA. Finalmente. Nuje già ve l’avevamo assicurato, letture mieje, ‘nzi da quando tutte quante ll’autre parevano metterla ‘ndubbio, o non nce credevano affatto , e nuje dicevamo con a faccia a prova de ‘mbomma ca la guerra veneva, nn’eramo fortemente sicure, e conchiudevamo dicenno dinto a lu nummaro 30 nuosto “ve l’avrite d’arricordà”: Donga guerra? Guerra pe quanto è certo ca simmo vive. E assicurative ca non ce sarrà maje na bona pace si non avarrammo na bona guerra primmo. E tanto nisciuno se credeva ca la guerra se fosse affacciata veramente dinto all’Italia nosta. Ogneduno se ne faceva na risata; e tutte quante penzavano tanto all’avvecenarese de la guerra quanto io pozzo penzà a li diebbete de ll’amice mieie. Ma ogge pare ca lu cielo s’avesse voluto arricordà de nuje, accussì ‘nzicco ‘nzacco, quanno manco nce lu credevamo, e sotto l’impressione de la Vorza de lu commercio che se ne scenne a rrotola a rrotola ogne ghiurorno….. Ca lu governo vedenno mal’aria a Baia à mannato a chiammà a Zi Peppe (mo è buono Zi Peppé!) lu quale, sia ditto a annore e gloria soja, non s’è saputo annià, e corrarà a organizzà no nuovo corpo de volontarie, che sarranno commannate da isso, e avranno a soperiure purzì paricchie affizziale de ll’eserceto che se trovano all’aspettativa. Zi Peppe sta pe portà ‘nPiemonte da no momento all’autro; viva addonga Zi Peppe, e abbascio la Conzortaria. Via addonga la guerra e abbascio la camorra governativa.... Io si fosse quacche piezzo grusso, e, ‘vece de la sporta sotto e la lenterna mmano, portasse na sciabola trenante, e no revolvero a 45 colpe, vorria commannà io no poco la facenna, e agghiustà tutte le cose a modo mio. A primmo appetito l’avanguardia de ll’armata taliana la farrìa componere de tutte li camorriste ministeriale. Appriesso nce mettarria a Sella, Scialoja e Minghetti: chiste tre che sò nate co li tasse dinto e la coscienzia e che nce ànno appezentute cuotte e crude. Po Spaventa, Peruzzi, Rattazze tutto lo riesto de li conzorte taliane. Arreto o a fianco a chiste, li giornaliste co la livrera, zoé chille tale essere vennute ch’ànno la pagnotta a lu mese pe ncenzià tutte ll’azziune de li ministre. E accussì via discorrendo. A le pprimme cannunate se ne jarria pe ll’aria la camorra. A le sseconne lu terno de li crucefessure nuoste. A le tterze lu riesto dei chille ch’ànno ajutato a tirarce li piede. E restarriamo sule sule, cujete cujete, nuje, l’Italia e la gente de cuscienzia; Cola fra Ccola e lu Priore. Che bella cosa sarria! Ma lassammo fa a lu Cielo. Tutto sta a principia rese na cosa, e ogni pprencipio porta le conzequenzie soje appriesso a isso. Preparammoce a la guerra, jate coraggiose a la guerra e chello che bene appriesso lu ssape Ddio. MO PARE CA NCE SIMMO. LU TROVATORE. (Mercoledì 2 abrile 1866).