\\ Home Page : Articolo : Stampa
PULICENELLA CETRULO
Di Admin (del 10/01/2020 @ 23:54:57, in articoli , linkato 52 volte)
Pulicenella cetrulo de lo popolo napolitano, primmo prencepe de tutte li buffune passate, preterite e ffetuse, ecceuza, ecceuza, ecceuza. Facimme acconoscere a tutte li napolitane la justizia fatta da la Gran Corte criminale de Napole, la quale ha ordenato de metterse a libbertà li 70 lavorature de la strada ferrata, che fujeno arrestate pe crapiccio de Monzù Spaventa e trasportate a Ponza, senza rispettà l'articolo de la Costituzione che proibisce ll'arreste a ccapocchia. Facimmo porzì a ccanoscere ca lo Questore (chillo che na vota se chiammava Prefetto de Polizia) appena saputa la decisione de la Corte criminale, ha subbeto subbeto ordinato de fa ritornà tante patre de famiglia ntra le braccia de le mogliere e de li figlie loro. Ebbiva, addonca, la Corte Criminale e lo Questore, e se scapacitasse lo popolo, ca ogge la justizia se fà, e non so chiù li tiempe passate ca chi teneva danaro faceva chello che bboleva, e chille che non tenevano niente avevano sempe tuorto!